避险与争胜（１１） 陆羽仁

美股大升后牛皮，昨日道指微跌１６点，由而家到下周二，港股和美股进入炒减息的日子，然后睇吓伯南克开大定开细，开大，减够半厘，如果香港起码跟到减四分一厘，大市就维持上炒格局；若果开细，只减四分一厘或唔减，后市就有较大回吐压力。当然港股还要睇睇阿爷会否星期五收市后又出招。


早前打算写完的「避险与争胜篇」，因为网友的问题，写吓续篇，我话美国次按和楼市的问题如海啸一样，还有大灾难在后头，如今只是大海啸前的退潮，你去海滩执蚬执虾要小心。网友yuki问，海啸来得咁急咁快，到时有无足够时俾我地睇到渠来之前的讯息号呢？

网友benny的回应好好，大家可以睇睇：
「 Yuki:呢排我都一路谂紧你讲既问题，睇咗陆sir个blog同金曹师兄、其他师兄师姐既回应咁耐，我发觉自己有一个好重要既观念改变，以前成日想揾到好清晰既指标话比自己听点做，譬如一只股升到阿妈都唔认得，应该几时放？点先可以赚到尽?入市价点先可以做到最平?


但渐渐发觉，呢d谂法太理想化，因为股票市场入面既种种现象，系唔同人既意愿不断互动所产生出黎，由于人心难测，我认识到"摸住石头过河"既道理。

应用番去你既问题，从一个中线投资既角度，我都好想知道几时系呢一轮既浪顶，但我谂绝对无可能会有足够既signals话比我地听，我自己会睇散户情绪(因为大户系睇住呢样黎玩)、资金流向、经济情况(即大环境同大户做嘢方向既关系)等，但都好片面，因为遇上突发事件(往往股灾就系黐住突发事件)，全部无用。


咁退一步讲，如果唔能够赚到尽，不如谂吓点样"尽量赚到尽"，我谂方法有好多，其中一样系大家成日讲既分段沽、分注买，我觉得非常有用，因为如果一嘢买哂或沽哂而最后发觉做错事，个吓心理压力好鬼大(仲有一d系侧边睇嘢既人既笑骂声)，分段沽、分注买绝对可以帮到手。


至于你话有冇足够时间俾你走，我谂如果套用上面讲既分段沽，时间永远系够，只不过睇吓你想赚几多。 」

　　
你地睇陆羽仁的文章长啲时间，就会发现我讲投资和其他人好唔同。普通人讲单面，我会讲双面；普通人一系讲升，一系讲跌，我会讲升完会跌，或者跌完会升；普通人讲买股唔分投资与投机，我会讲买股前首先要分清自己想做什么；普通人讲估计赢几多钱，我话要同时估计赢钱和输钱；普通人用紧散户的思维，我尝试追踪大户的部署（虽然好多时只系估到六成）；普通人靠买中一个方向赚钱，我会讲大户靠人造波动赚钱，你追到渠啲波动搭顺风车会赚到啲钱，或者至少唔好输钱。

　　
你想像吓一个镜头，你好快乐地在海滩执蚬，只只又肥又大，的确是一幅好开心的图画；若把镜头一路拉濶，升上高空，才会看到远方有一排排海啸巨浪涌至，又变成好凶险的场面；一件事是好是坏，视乎你在什么时空，用什么角度看。你话咁凶险就最好唔买，等海啸啦。我就话，咁系唔系最好方法，真系两睇，我讲海啸，的确系觉得渠有机会来，例如有七成机会，但仍有三成机会渠不来，即使渠来，又点知渠几时来呢？若你停手唔买股，跟住见个市起势升，会唔会在更高位忍唔住落场呢？人通常是「眼见为真」，当眼见股市鸡犬皆升时，又点忍得住唔落场呢？


股市散仔，买股票天天发梦最低位买最高位沽，例如几年前以１．５元买中石油（０８５７），问吓目标价，那个时候最乐观的分析员都系睇３元（他即使睇得好啲，都唔会把目标价讲得太高，以防「最后」唔到价跌番落去时你骂他），你见「到价」自然会沽，然后等跌，渠无跌，仲升到无影，你就好揼心。


见到股神巴菲特沽中石油，你地问渠什么心态。首先，股神买股无定一个目标价，渠会以公司的长线收益，折现成一个现金价值，若股票的市价比估计现金价值低好多时，渠就会买，假设渠当日买中石油时计出来的现金价值系每股４元，当时股票１元多，比估计价值有好大折让，视为抵买。其次，股神沽股票是觉得基本因素改变，若果系好股，基本因素无变，渠会长揸，所以渠沽中石油系认为基本因素改变了，我地唔知渠认为基本改咗乜，到底是认为中国经济过热，会爆，抑或次按好大剂，全球经济有危机，甚至令油价上升轨终结，唔知，但他应该有他的一套估计。但股神睇得好长线，货又多，减货不能减得太快，但渠一定觉得中石油、中国市场、石油市场甚至环球股市有啲问题。


讲番散仔，投资唔讲，只讲投机，有人太贪，有人太细胆，要啱啱好才可以赚到大钱。有蚬唔执，可能是太胆少，假设未来几个月股市大升，跟住你就会俾人话，听个乜水陆羽仁讲，话有海啸，浪花都无个，正傻仔，你俾人笑一个月尚可，笑两三个月就会顶唔顺，我又会损失一个读者。我经常话，预测股灾无用，股灾最后会来，睇吓几时，如果股灾明年今日到，我今日一年前大讲股灾，就系讲错，所以有蚬要执，你可能今日执完明日都走咗都话唔定o架。


但系话说回来，执蚬唔紧要，但每天都要有个防范心，一唔对路就闪，若果一直无出事，高位都要食吓糊，要避险和争胜心兼备。因为执得两执，你执到成手蚬，就会觉得自己好叻，系股神，我不能够不提醒大家，包括我在内，大家都系股蚁，外资大户才是股神，人地住山顶，我地住山脚，实力太悬殊，我不会定死一个指数目标，但大市升上２５０００点楼上风险开始增加，愈高愈危，大家自己执生，海啸唔会一晚发生，只要你有防范心，唔对路时唔好赖死唔走，就OK。记住赢钱好多时讲心态，讲纪律，顺势而炒，直至可能转势时就要走避（其实炒股同股神沽货的原理一样，持货至可能转势时），无人可以做到最低位最高位沽，唔好咁傻咁样要求自己啦！炒股要有胆去炒，同时要知足食吓糊。