X记控投(陆羽仁)

昨日港股受欧洲股市拖累下跌，结果英国股市收市跌１．８％，只北石银行都跌三成几，英国金融市场仍然样衰，不过美股都几硬净，害死英国后自己唔郁，美股道指只系微跌３９点，牛皮等减息，睇吓港股又可否顶番住。


好多朋友无论做人和买股都好乱，目标不清，左右飘移，咁样做一世都上唔到岸，今日可以讲吓控制个人理财和投资的基本心法，网友小潘提到把自己当作一间公司咁经营，我过去都用过此方法，所以不妨讲讲。


小潘叫阿K唔好炒炒吓时咁讲：「唔知你有冇当自己系一间上市公司咁经营?我就会每年定下一个目标，呢个目标系用以往赚既钱作为基本，我唔贪心，可能会set 10- 20%增长目标，有本事就set高一d。呢个增长目标，包括透过节流(虽然辛苦d，不过几有用)，搵多d兼职，工作上努力，博年中花红以及投资。每一方面都要做到，不可以过份依赖某一方面收入来源。其实，长远最后系做到靠投资既钱退休，不过希望是50岁后能做到，一d都唔贪心挂。


之后，每3个月检讨一次进度(如果投资及收入不是很多，可以半年至检讨一次)，你会知道自己系唔系达标，而增加或保持增加收入既各种方法。 (上次因为3个月都冇计数，于是就买错交行,沽错MTR，衰心急)。 」


陆羽仁后生时也用过这个方法，我是一个开支永远追不上收入的人（这是孤寒的代名词），有一阵子见户口的钱不断增加，唔知自己用几多钱一个月，就专门每次去提款时都记低，月底对数，计出一个月要用多少钱，然后计出每月储蓄多少（收入减开支）。


讲理财，首先要讲收入和支出的管理，把自己当作一间公司，要成为赚到钱的好公司，就要盈利快速增长，方法不外乎是「增加收入，控制支出」（如果不是减少支出的话），好多后生仔开支大过收入，这种是蚀钱公司，靠借贷渡日，水源一断，立刻玩完，美国佬系典型，无论渠哋赚几多钱都好，消费永远大过收入，最近次按风潮起，华尔街开始炒人，好多人做到投资银行部门主管，住大屋开靓车，一俾人炒三个月内搵唔番工就跌入地狱，因为平时使大哂，住啲屋永远超乎自己负担能力，靠未来可能增加的收入来顶，楼价升咗就加按去旅行，有个中环茶友话我听，一年前渠参加一个加勒比海豪华邮轮之旅，同船差不多有一半美国客话俾佢知，他们是加按物业攞钱去旅行，使咗先至算，所以次按在美国爆起上来咁大镬，美国人无论穷或富，都无holding power（持货力），因为借到突哂。


讲完开支大，就要讲收入少，我经常讲，以后生仔计，自己的事业就是人生的最大投资，若事业做得好，可以产生好稳定而大量的正回报，而且会不断增加，就算你完全唔识投资，但事业做得好好，都可以致富，这就是最传统的发达方法，个个阿妈都会咁教仔，你乖乖地读好书，入大学，做乜师物师就得o架啦，陆羽仁阿妈的年代要求更低，求其搵到份「写字楼工」，有得凉泠气开工，已经好好啦。咁o既观念虽然陈旧，但有其道理，做好自己份工，就是人生最大投资。如果你系后生仔，做多份兼职，都可以增加收入，唔一定要靠哂投资。


好啦，点都讲吓投资，投资得好，可以增加收入，收入甚至高过你o既本业，若出现咁o既情况，好多后生仔会想转行全职做投资，觉得搵到食，甚至可以发大达，咁o既路似易实难，因为收入好可能因为个市好，不是自己特别叻，但股市不可能长期系咁升，到走势逆转向下炒兼静过鬼时，全职炒股也不易搵食。后生仔头几年好重要，头五年做得好，在行业内已可拔尖，你大学毕业去咗全职炒股几年，若无所成，想返番本业唔系咁易，等如跑步让赛，人地跑咗半个圈，你先至走入再跑一样，好难追上。


我觉得在一般情况，特别系后生仔，投资只是配菜，不是主菜，但你食呢味配菜，都要讲究策略，最基本的策略，系你嗰间「 X记控投有限公司」究竟是蓝筹，还是五、六线公司，究竟要稳阵，还是要博命呢？ （明天续谈）